Hitzaldiaren izenburua "Pil-pila inspirazio gisa" zen eta behin hitzaldia eginda, bertaratuek ulertu dute, hain zuzen, emultsionatzeko modu hori aitzakia bat baino ez zela Pedro Sánchezek (Bagá*, Jaén) bere izateko, pentsatzeko eta prestatzeko modua garatzeko.

Egia da azaldu duela legatzarekin eta bere gantzarekin gurin bat egin daitekeela, eta hori "eskandaluzko" saltsa holandar baten oinarria izango dela. Edo, perretxikoak eta kolagenoa osagai bakar gisa dituen itsaso eta mendi nahaski bat egiten duela. Bakailao buruko gelatinarekin egindako pistatxo-pralina ere erakutsi du, edo bakailao pil-pilean prestatutako oilasko erre larruak. Baina bere hitzaldiak, batzuetan entzuleen galdera edo iruzkinen laguntzarekin, mami handia izan du.

"Baten bati pentsamoldea zabaltzen badiot, mereziko zuen hemen egotea", esanez hasi da. Aitortu duenez, "kolagenoaren tenperatura oso hotza izatearekin obsesionatuta nago. Gehiago axola zaizkit testura eta tenperatura zaporea baino”. Bere platerak, berak dioenez “errazak dira, baina garrantzitsua dena kontzeptua da. Buruak, batzuetan, jokaldi makurrak egiten dizkigu, gutxiago beti delako gehiago, baldin eta konplexutasunik badago. Ezin dugu gauza erraz eta sinple bat egin, atzean ezer ez badu".

Bere hitzaldiaren zenbait unetan, Sánchezek Bagáren sukaldearen tamaina mugatuak berarentzat dakartzan mugak aipatu ditu. "Ezin dut arrainik erre, usain handia sortzen duelako, baina negozio gehiago izango banu, agian beste errezeta batzuk egingo nituzke, kroketak adibidez. Niri erraza iruditzen zait egiten dudana, eta horregatik egiten zait hain zaila azaltzea", esan du naturaltasun osoz.

"Halakoxe zaila naiz"

Izan ere, uste du berak ez duela asmatzen, baina "banaiz halakoxe zaila, errebeldea. Egun osoa ematen dugu Instagramen, azkar nahi dugu dena... Teknika pixkanaka heldu egin behar da, kontrolatuz. Bagák bestelakoak izatera behartzen gaitu. Burura etortzen zaizkidan ideien % 80 ezin dira gauzatu, hiru sukaldari besterik ez garelako. Espazioa hain da arraroa, arlo guztietan egiten gaituela desberdin”. Hori bai, jatetxearen maximetako bat da "gutxirekin asko egin daitekeela".

Ikusleek hitza hartu duten horietako batean, José Carlos Capelek hartu du hitza, Madrid Fusióneko zuzendariak, eta adierazi du Pedro Sánchezek baduela "zerbait berezia, eta horrekin sukaldari onenak berotzen" dituela. "Zure soiltasunarekin disimulatzen duzun zerbait duzu, sekulakoa iruditzen zaidan zerbaiti garrantzia kentzen diozu, bide berriak irekitzen dituzulako. Bi osagairekin egiten dituzu platerak eta, horiekin, hamar emanalditan, mahaikidea altxatzen duzu". Chefak honela erantzun du: "garrantzitsua da produktuan pentsatzea, baina baita harekin nahi duzuna egitea ere. Zergatik ez prestatu arrautza bat almibarretan eta postrerako jarri? Probokazio bat al da? Flan batean edo aingeru-torrada batean jada badago eta! Garrantzitsua dena beste era batera pentsatzea da”.