Ekonomiako eta arte ederretako ikasketak egin ondoren, publizitateko exekutibo lanean amaitu zuen, baina bere alderdi sortzaileena lantzeko zuen beharrak sukalderaino eraman zuen. Horrela, 2007an, Leo jatetxea ireki zuen Espinosak, Bogotan dagoena eta kolonbiar zaporeen alderdi herrikoia eta autoktonoa aldarrikatzen dituen sukaldaritza-proposamena; hala ere, arte garaikidearekin eta herrialdeko leku ezberdinetako ikuspegi antropologikoarekin konbinatzen ditu betiko zaporeok. 

Leo sortu eta urtebetera, bere ikuspegi gastronomiko-antropologikoa zabaldu eta, Laura Fernandezekin batera –alaba eta somelierra–, FunLeo sortu zuen. Fundazio horrekin, Kolonbiako komunitate etnikoen sekretu indigenak eta antzinako teknikak berreskuratu ditu chefak, haiei balioa eman eta kolonbiar diskurtso gastronomikoan txertatzeko.